1. Кемеңгердің алғыр ойын берсін,

Екі дүниенің абыройын берсін!

 

2. Талаптымен тау астырсын,

Талантымен таластырсын.

Жамандықтан адастырсын,

Жақсылықпен жанастырсын!

 

3. Білімің молая берсін,

Еңбегің зорая берсін.

 

 4. Мақсаттарың айқын болсын,

Өмірлерің жарқын болсын.

Еңбектерің көшелі болсын!

 

5. Білімің тереңдесін, бауырым!

Өнерің кемелденсін, бауырым!

Жұлдызың жайнасыншы, бауырым!

Табаның таймасыншы, бауырым!

Дос-жарың безінбесін, бауырым!

Қысылса сені іздесін, бауырым!

Жете бер аңсап күткен тілегіңе,

Қылаудай дақ түспесін жүрегіңе.

Отанның, ел-жұртыңның мақтаны бол,

Алды бол қатарыңның бұл өмірде.

 

Себездеп алтын ара   жан-жағыңнан,

Ту тіккен алаулаған арманыңнан.

Кеудеңде махаббаттың шоғы маздап,

Биіктен биіктерге самға, қыран.

 

Ізгі боп лебізіңді сағынатын,

Жігіт бол дос, дұшпаның табынатын.

Айналсын ар туына адалдығын,

Адам боп ұялатқан жанына күн.

 

Жүр асқақ күншілдердің басып мысын,

Жүректің түпкірінен жаһұт ұсын.

Таба біл тіршілікте керегіңді,

Басыңнан арылмасын бақыт құсың!

 

 Құрдасыңа – қуаныш бол,

Сырласыңа – сынық бол,

Жылағанға жұбаныш бол,

Туысыңа тұнық бол,

Татулыққа  - тамаша бол,

Ықыласқа – иық бол,

Ана алдында аласа бол,

Ар алдында биік бол.

Әумин

****************

 Атаның наласынан сақтасын,

Баланың шаласынан сақтасын,

Ағайынның аласынан сақтасын,

Жамандардың жаласынан сақтасын.

Әумин

****************

Берекеміз қашпасын,

Белімізді ешкім баспасын,

Адал жан болып астасың,

Арыңды күлдей шашпасын.

Бақыт болса бастасың,

Мейманың, сірә, таспасын,

Тірлікте түзу жол тапсаң,

Тәңірім берер басқасын.

Әумин

****************

Әуелі құдай есен ет,

Жиреншедей шешен ет,

Атымтайдай көсем ет,

Лұқпандай береген ет.

Ибраһимнің басын берсін,

Сүлейменнің тақытын берсін.

Қыдыр құсы қонсын басыңа.

Жортқанда жолың болсын,

Жолдасың қыдыр болсын.

Жоғары болсын жұлдызың,

Бақытты болсын ұл-қызың.

Ас иесі байысын,

Бар ойлаған арманың,

Жақсылыққа сайысын.

Әумин

****************

Ағайынға бата

 

Ағайының ала болмасын,

Ақыл-ойы шала болмасын,

Татулығы шырақ болсын,

Табыстары бұлақ болсын.

Бірлігіне біте түспесін,

Тірлігіне түте түспесін.

Жайраңдаумен күліп жүрсін,

Жақсыларды біліп жүрсін.

Әумин

****************

Құдай пейіл тарылтпасын,

Қуаныштан арылтпасын.

Халқым ешбір қамықпасын,

Қасиеті шарықтасын.

Әумин

****************

Ханның тақытын берсін,

Игі жақсының бақытын берсін,

Батырдың жүрегін берсін,

Балуанның білегін берсін,

Бидің әділ төресін берсін,

Кәрінің ақыл-кеңесін берсін,

Шебердің қолын берсін,

Шешеннің жолын берсін,

Ғалымның данасын берсін,

Сабырлының санасын берсін,

Бәйбішенің сабасын берсін,

Ақсақалдың тобасын берсін,

Төренің тектілігін берсін,

Құданың қамқорын берсін,

Қыранның шәулісін берсін,

Тазының құмайын берсін,

Жүйріктің шаңдозын берсін,

Жігіттің жампозын берсін,

Алғанның аруын берсін,

Келіннің тәуірін берсін,

Серінің сәнін берсін,

Салдың әнін берсін,

Байдың дәулетін берсін,

Үйіп-төгіп бәрін берсін.

Әумин

***********

тойға бата

Әуелі құдай оңдасын!

Тойың-тойға ұлассын!

Ризығың мол болсын,

Тойларың құтты болсын,

Ұл-қыз бақытты болсын!

Жұлдызы жоғары болсын,

Риза болсын мейманың,

Орнына келер жинағың,

Көпшіліктен бата алсаң,

Мұратыңа жетерсің,

Жомарттық қылсаң тірлікте,

Қуанышпен өтерсің.

Ықыласқа тойдық біз.

Шақырған соң келдік біз,

Келмек – сүннет,

Қайту – парыз.

Тойыңыз тойға ұлассын,

Келген ізбен қайтамыз,

Әумин, Аллаһу әкбар!

***********

Әумин десең маған,

Берейін бата саған.

Қатарыңның алды бол

Тең құрбыңның туы бол.

Қайырлы болсын тойларың,

Орындалсын ойларың

Гүлге толсын өңірің,

Көңілді өтсін өмірің.

Асқа толсын табағың,

Ашық болсын қабағың.

Бола берсін тойларың,

Аман болсын отбасың.

Жүзге жасың жеткенше,

Жағың төмен түскенше,

Болмай өтсін арманың.

Баталы құл арымас,

Көп бата сауап алғанның

Бағы кеміп сарқылмас.

Әумин,Аллаһу әкбар!

********

Баталар

 

Ақылың ассын,

Ықыласың тассын,

Балаң үбірлі болсын,

Қызың шүбірлі болсын,

Жақының көп болсын,

Дұшпаның жоқ болсын,

Жақсы келсін қасыңа,

Нұр жаусын басыңа,

Көшің көлікті болсын,

Қонысың түлікті болсын.

Қатулықтан аулақ бол,

Татулыққа жақын бол.

Дәуренің сәнді болсын,

Ғұмырың мәнді болсын.

Таңың азанды болсын,

Үйің қазанды болсын,

Шаңырағыңа құт құйылсын,

Дастарханыңа жұрт жиылсын,

Әумин.

*********

Бисмиллаһир – рахманир – рахим,

Уа, Жаратқан Ием құдірет,

Тілегімізді қабыл ет,

Иманымызды кәміл ет!

Достың көңілін аша көр,

Дұшпанның көңілін баса көр.

Әділдікті бұрғаннан сақта,

Қайырымсыз туғаннан сақта.

Өтпес пышақ, шабан атыңнан сақта.

Кедергі мен кеселден сақта.

Түздегіні түзде сақта,

Жалақтаған жаудан сақта!

Ашынған ұрыдан сақта,

Далақтаған даудан сақта,

Дауылдың кәрінен сақта,

Жыланның зәрінен сақта!

Жаратушы жан Ием,

Айтқанымды қабыл ет,

Әумин Аллаһу әкбар!

***********

Уа, Жаратқан, жарылқа,

Бақ-дәулетін аумас қыл!

Ала ауыздан алас қыл,

Қарғағаннан қалас қыл!

Ниеттері ақ болсын,

Бейнеттері пәк болсын!

Өрендерің ер болсын,

Отырғаның төр болсын,

Көре алмаған бағыңды,

Сындыра алмай сағыңды,

Қара ниет дұшпаның,

Бетін басып жер болсын!

Қонысың өрісті болсын,

Еккенің келісті болсын.

Еңбегің жемісті болсын!

Жарың жібектей болсын!

Өнерің өрлей берсін,

Өмірің төрлей берсін!

*********

Берекеміз қашпасын,

Белімізді ешкім баспасын,

Адал жан болып астасың,

Арыңды күлдей шашпасын.

Бақыт болса бастасын,

Мейманың сірә, таспасын.

Тірлікте түзу жол тапсаң,

Тәңірім берер басқасын.

Әумин.

**********

Бақ келіп қонып басыңа,

Көңілің көлдей шалқысын.

Пейіліңе тойған қонағың,

Ішпей-жемей балқысын.

Әумин.

**********

Талмайтын талап берсін,

Самғайтын қанат берсін.

Баянды махаббат берсін,

Ұзақ ғұмыр, тұрлаулы бақыт берсін.

Әумин.

********

Абырой бер, аман сақта,

Оттан, судан сақта.

Тілсіз жаудан сақта.

Күле кіріп,

Күңірене шыққан дұшпаннан сақта.

*********

Құрдасыңа – қуаныш бол,

Сырласыңа – сынық бол,

Жылағанға жұбаныш бол,

Туысыңа тұнық бол.

Татулыққа – тамаша бол,

Ықыласқа – иық бол,

Ана алдында аласа бол,

Ар алдында биік бол.

Әумин.

*********

Атаның наласынан сақтасын,

Баланың шаласынан сақтасын,

Ағайынның аласынан сақтасын

Жамандардың жаласынан сақтасын.

Әумин.

*********

ЖАСТАРҒА  БАТА

Иә, Құдайым жарылқа

Жарылқағанның ішінде ет,

Екі аяғын есен ет,

Төрт бұрышын түгел ет,

Пәле-жаладан аман ет.

Сақтағайсың саламат.

Аузы қанды бөріден сақта

Аяғы қанды ұрыдан сақта.

Күле кіріп, күңірене шыққаннан сақта,

Төрде отырып шіренгеннен сақта.

Байлық пенен бақ беріп,

Құрбысының алды ет.

Көл ет, көп ет,

Көлді мамыр ет.

Не тілегенін әзір ет

Досты Аллаһ бездірме,

Сүйген көңілін үздірме.

Дүние үшін қызығып,

Кейін қалып кездірме.

Тілек тілеп Аллаһтан

Біреуге көзін сүздірме.

Әумин, Аллаһу әкбар!

**********

Қуаныштың тұрағы бол,

Ұлан істің бұлағы бол.

Мерекенің құрағы бол,

Мейірімнің шырағы бол.

Сабырлылықтың сыңары бол,

Пәк үлгінің шынары бол.

Туырлықтың тұмары бол,

Тұлғалы ұлттың құмары бол.

Әумин.

Құрметті той иесі,

Ісіңді тағдыр оңдасын,

Қайда жүрсең қолтықтап,

Қыдыр бабаң қолдасын!

Жамбылға ұқсап көп жаса,

Денеңде дерт болмасын,

Тойың тойға ұласып,

Жан-жүрегің толғансын,

Күннен-күнге көбейсін,

Дос-жараның, жолдасың.

Бақытың тассын әманда,

Бергенін тәңірі алмасын!

Өміріңді ұзартып,

Балаң менен немерең,

Шөберең мен шөпшегің,

Туажаттар жалғассын!

СОҒЫМ БАТАСЫ

 Соғым қайырлы болсын,

Қазаның тоқ болсын,

Уайымың жоқ болсын,

Дастархандарың кең болсын!

Бала - шағаң ер болсын!

Бізге бергеннің есесін берсін!

Әумин!

**********

ҚАРИЯЛАРҒА  БАТА

 Түндерің тыныш болсын,

Үйлеріңе ырыс толсын!

Келіндерің есті болсын,

Ұлдарың сесті болсын.

Балаларың қуаныш әкелсін,

Немерелер жұбаныш әкелсін.

Орындарың төр болсын,

Дастархандарың мол болсын.

Қатарларың көп болсын,

Уайым-қайғыларың жоқ болсын.

Жастардың қазасын көрмеңдер,

Зұлымдардың жаласын көрмеңдер.

Еліңде бірлік болсын,

Жарасты тірлік болсын!

Әумин.

*********

ХАЛЫҚҚА БАТА.

Уа, Жаратқан Ием!

Халқымды даласымен сақта.

Елімізді данасымен сақта,

Сәбиді анасымен сақта

Азаматты санасымен сақта

Жұртымды қасірет-қайғыдан сақта

Халыққа төнген қауіптен сақта

Табиғи апаттардан сақта.

Уа, халқым бауырың бүтін болсын!

Сарқылмас құтың болсын!

Күніміз ұлысты болсын!

Жеріміз ырысты болсын!

Елбасы бірлікке себепті болсын!

Жаппар Ием жар болып

Бұл бата қабыл болсын!

Әумин, Аллаһу әкбар!

************

Үй-іші, ауыл-аймақ аман болсын!

Баршамызға тыныштық заман болсын,

Табиғат таусылмайтын ризық беріп,

Татулы дастарханың тағам болсын!

 

Абырой, амандығың арта берсін,

Бақ-дәулет қызығымен қатар берсін,

Қонағың жақсы көрген жиі келіп,

Таусылмас-дәм-тұзыңды тата берсін!

 

Осындай ойын-сауық бола берсін,

Үйіңіз той думанға тола берсін,

Өмірдің гүл жайнаған қанаты боп,

Бақшаңа бақыт құсы қона берсін!

 

Тыныштық елімізге келе берсін,

Молшылық жерімізге ене берсін,

Апаттан ел-жұртымыз аман болып,

Қызығын бейнет еңбек көре берсін!

 

Осы үйге көп қылып бала берсін,

Балаға таудай талап сана берсін.

Бәрі де балалардың өнерлі боп,

Бақыты барған сайын жана берсін!

 

Осы үйге сұлу мінез келін берсін,

Келінге адал ниет, пейіл берсін,

Ақ көңіл, ата-анаға мейірімді боп,

Қызығына бала шаға түгел көрсін!

 

Жаныңда жақсы көрер көршің болсын,

Көршің де өзіңдейін көпшіл болсын,

Көрші-көлем, туған-туыс, жекжаттарың,

Баршасы аман-есен өсіп-өнсін»

 

Дастарханыңнан дәм кетпесін,

Көңіліңнен сән кетпесін,

Отбасың түгел аман болып,

Өміріңнен мән кетпесін!

*************

Әумин десең маған –

Құдай берсін саған!

Оң жағыңа қарасаң,

Алтыннан терек орнасын!

Сол жағыңа қарасаң,

Күмістей терек орнасын!

Жылы жүзді иманды

Жақсы болсын жолдасың,

Еш жамандық болмасын,

Құт-береке дарытып,

Құдайым өзі қолдасын!

************

Уа, құтты отаудың иесі!

Қолдасын Тәңір киесі!

Инабатың жақсылыққа бастасын,

Пейілің жамандыққа баспасын!

Ошағыңның оты сөнбесін,

Арың мен жаның арамдыққа көнбесін!

Босағаң әрқашан берік болсын,

Қосағың әрдайым жерік болсын!

Ата-анаңның қадірін біл,

Әмірдің әділін біл!

Өнегеңді қазық ет,

Ақылыңды азық ет!

Сағың еш сынбасын,

Бағың тек нұрлансын!

Ой-пікірің көсем болсын,

Айтар сөзің шешен болсын!

Осы айтқанның бәрі періштенің құлағына шалынсын,

Тілек-ниетіміз мұстажап боп, қабыл алынсын!

**************

Әумин десең бізге,

Бата берелік сізге!

Жасың жетсін жүзге,

Желің кетсін құла түзге.

Басқа қандай іс түссе де,

Алладан күдер үзбе!

***********

Құдайдың құлымын дегейсің,

Мұхаммед үмбетімін дегейсің.

Шадияр досым дегейсің,

Имам Ағзамның қауымында қыл!

Шайтанның бәрінен сақта,

Патшаның кәрінен сақта,

Намаздың қазасынан сақта.

Пайғамбардың туында қыл,

Әуіз – Кәусардың суында қыл.

Иман байлығын бер,

Дененің саулығын бер!

***********

Құдайдың өзі оңдасын!

Бес жүз саулық қоздасын.

Сексен інген ботадан,

Сегіз келін қомдасын.

Айдап келген жылқыңнан,

Алпыс айғыр азынасын.

Жиып келген түйеңнен,

Жетпіс інген боздасын.

Өзіңнен байлық озбасын!

Ағайынның жарлысы

Бөтен тозбасын!

Болмасын деген оңбасы,

Үйіңе дерт қонбасын!

Керім жан боп көршілер,

Жақсы болсын жолдасың!

Берекелінің биесін берсін,

Асыл тектінің түйесін берсін,

Ізгі ниеттің ойын берсін,

Сол малыңа ие берсін,

Сауабы ата-бабаңа тие берсін!

**********

Қаскөйдің теріс батасынан сақта,

Қаскүнемнің күнә-қатасынан сақта!

Басшының ноқайынан сақта,

Қоңсының қоқайынан сақта!

Халықты тілдегеннен сақта.

Кісіні күндегеннен сақта!

Намысты таптағаннан сақта,

әбүйірін жаппағаннан сақта!

Тілің күрмеліп, күрмегеннен сақта.

Дінін ұмытып, білмегеннен сақта!

Әділді теріс бұрғаннан сақта,

Әділетсіз билік құрғаннан сақта!

Аманатты аттап, ұмытқаннан сақта,

Елдің қазынасына құныққаннан сақта!

Әкімнің сыбайлас жемқорынан сақта,

Әліпті таяқ деп білмесе ең қорынан сақта!

Арын арақ-сыраға сатқан мастардан сақта,

Абыройсыз, күнәға батқан жастардан сақта!

Киені білмес кесірден сақта,

Жеңіл жүрісті жесірден сақта!

Кеудесін керген келіннен сақта,

Мезгілсіз келген өлімнен сақта!

Күліп кіріп, күңіреніп шыққан жауынан сақта,

Үлкенінде нақыл, кішісінде ақыл жоқ,

Ағайынның бітпейтін дауынан сақта!

************

Орға жығар сенімнен сақта,

Орамалсыз келіннен сақта,

Опық жегізер өлімнен сақта!

Қыздың әсемпаз, сәнқойынан сақта,

Ұлдың әуейі, даңғойынан сақта!

Ұрпақтың имансыз-кемтарынан сақта,

Киімнің денеге жабысқан ең тарынан сақта!

Кеудесі ашық қатыннан сақта,

Кеудемсоқ, көзсіз «батырдан» сақта!

Берекеті кетіп, мазасы қашқаннан сақта,

Дүниені құр бекер шашқаннан сақта,

Көпіріп, мейманасы тасқаннан сақта,

Көшедегі кіндігін ашқаннан сақта!

Көрінгенге көзін сүзгеннен сақта,

Құдайдан үмітін үзгеннен сақта!

Уа, Алла! Діннен безген қазақтан сақта,

Қабірдегі құтылмас азаптан сақта!

************

Азамат туы ар болар,

Әділдік соған нәр болар.

Жадыңа тұтсаң осыны,

Жақсылық саған жар болар.

Досына құшақ жайғанның

Қасының жолы тар болар.

Тілектен қазына жиғанның

Ошағы орны бар болар.

Ошақта отың маздасын,

Орныңнан ор қазбасын.

**********

Сүлейменнің тақытын берсін.

Қыдыр құсы қонсын қасыңа,

Бұлбұл құсы қонсын басыңа.

Жортқанда жолың болсын,

Жолдасың Қыдыр болсын.

Жоғары болсын жұлдызың,

Бақытты болсын ұл-қызың.

Ас иесі байысын,

Бар ойлаған арманың,

Жақсылыққа жайылсын.

**********

Қуаныштың тұрағы бол,

Ұлан істің бұлағы бол.

Мерекенің құрағы бол,

Мейірімнің шырағы бол.

Сабырлықтың сыңары бол,

Пәк үлгінің шынары бол.

Тұралықтың тұмары бол,

Тұлғалы ұлттың құмары бол.

                                   Әумин!

**********

Жақсы ұлың сүйенетін тау болсын,

Жақсы туыс қалқан менен бел болсын,

Тәңір сені жамандықтан жебесін,

Тірлігінде тұрлаусыз жан демесін.

                                            Әумин

**********

Бедері кеткен қамқадан

Берік тоқылған бөз артық.

Берекесіз туыстан,

Берік байласқан сөз артық.

Жақын деп жаманға қайырылма,

Жат деп жақсыдан айырылма.

Өгізді өрге сүйреме,

Қанат, қарың талар,

Қанат қарың талса,

Қарға-құзғын алар.

Жақыннан зиян қыл,

Алыстан пайда қыл,

Тышқан да інінен алыс жайылады,

Соны да есіңе ал.

Қайтып кірер есікті

Қатты жаппағайсың.

Ол кім десең – сүйек, жекжат.

«Су сүзілмейді, сүйек үзілмейді».

Осы айтқандарымды есіңе сақтасаң,

Ешкімнен қор болмайсың!

                                      Әумин

**********

Ханның  тақытын  берсін,

Халықтың қамын жесін деп.

Игі жақсының бақытын берсін,

Ынсаппен ғұмыр кешір деп.

 

Батырдың жүрегін берсін,

Шабынған жауды қусын деп.

Балуанның білегін берсін,

Тәуекелге белін бусын деп.

Бидің әділ төресін берсін,

Озбырдың құты қашсын деп.

Кәрінің ақыл кеңесін берсін,

Кәріптің көңілі тассын деп.

 

Шебердің қолын берсін,

Өнердің бағын ашсын деп.

Шешеннің жолын берсін,

Ұрпаққа үлгі шашсын деп.

 

Ғалымның данасын берсін,

Көкейге ілім қонсын деп.

Сабырлының санасын берсін,

Дүниені саралап берсін деп.

 

Бәйбішенің сабасын берсін,

Ырыздығы толсын деп.

Ақсақалдың тобасын берсін,

Еліне ұйытқы болсын деп.

 

Төренің тектілігін берсін,

Сүйек сындырмас бекзат болсын деп.

Құданың қамқорын берсін,

Жақсының жекжаты болсын деп.

 

Қыранның шәулісін берсін,

Қаққанда қиядан шалсын деп.

Тазының құмайын берсін,

Қапысыз аңын алсын деп.

 

Жүйріктің шаңдозын берсін,

Еліне олжа салсын деп.

Жігіттің жампозын берсін,

Атаның кегін алсын деп.

 

Алғанның аруын берсін,

Жардың көңілін тапсын деп.

Келіннің тәуірін берсін,

Ағайын, жұрқа жақсын деп.

 

Серінің сәнін берсін,

Салтанат, сұқбат құрсын деп.

Салдың салған әнін берсін,

Сауытқа ойнап-күлсін деп.

 

Молдананың азанын берсін,

Таупықпен тәубаға келсін деп.

Көпестің азабын берсін,

Алыс-жақынды аралап көрсін деп.

 

Байдың дәулетін берсін,

Молшылық құрса деп.

Үйіп-төгіп бәрін берсін,

Игілікке жұмса деп.

                                    Әумин

**********

Жас қосылсын жасыңа!

Оңға басса талабың,

Кеуіп босқа тасыма.

Тайып кетсе табаның,

Жүнжіп бекер жасыма,

Арам ойлы арсызбен

Бола көрме ашына.

Алды-артыңды ойламай

Іс қылмағай асыға.

Жолдас боп ер парықтап,

Жақсы адамның қасына.

Сонда жаның жай тауып,

Ас қосылсын асыңа,

Жас қосылсын жасыңа!

                                        Әумин

**********

Халқыңа жайлы бол,

Судай таза бол.

Желдей жүйрік болып,

Өмірің ұзақ болсын.

Аймағың суат болсын,

Сөзің халқыңа қуат болсын.

Халқыңның қалаулысы бол,

Балапандарыңның қорғаны бол!

                              Әумин

**********

Бүгінгідей ашық күн жайнай берсін көгімде,

Осы күннің астында гүлдей берсін елім де,

Жүрсін дәйім бақыт қана серік боп,

Тұрсын дәйім қуанышы көрік боп.

Ұлы өмірдің өзіндей жайнай берсін жасымыз,

Енді қайғы көрмесін ақ қыраулы басымыз.

Барлық халық тең болсын,

Бір-бірімен қуанышқа дос туысқан ел болсын.

Арандатқан адамды алауыздық жойылсын,

Мал-басымыз мол болып, ел ырысқа тойынсын.

Күніміз ұлысты болсын,

Жеріміз ырысты болсын.

Өрісіміз малға бай, дүбірлі болсын,

Келіндеріміз жанға бай, үбірлі-шүбірлі болсын.

Ер жігіттің ту етер ар-тұрағы,

Қанат беріп түлетер арғымағы болсын.

                                                 Әумин

**********

Е, Патша Құдайым, жарылқағанмен жандас ет,

Ораздымен оттас ет,

Кімді жарылқасаң, соның қасында ет,

Алдағы әзір, шүкір нәубет,

Астыр-тастыр,

Үзілістірмей ойластыр,

Жақсылармен жанастыр,

Жамандардан адастыр!

Дәулетің Зияда болсын,

Дұшпаның пиада болсын,

Құдайым тілегіңді берсін,

Тұсауыңды алсын!

Ерлердің дұғасы,

Жарандардың батасы,

Болмағай менің бұл батамның қатасы!

Тағы да бір Құдайым жарылқасын,

Иманың мен жасыңа Қыдыр дарысын!

Бата бер десеңіз бізге,

Бата бердің сізге.

Әрқашанда бізді

Той думаннан ізде.

Құдайым қуат беріп сізге,

Ұрындырмай күзге,

Жасыңызды жеткізсін жүзге.

Құдайым көктем берсін,

Көктем берсе – көптен берсін.

Құдайым жаздай берсін,

Жаздай берсе – жазбай берсін.

Құдайым күздей берсін,

Күздей берсе – үзбей берсін.

Құдайым қыстай берсін,

Қыстай берсе - қыспай берсін.

Құдайым көңіліңді жас қылсын.

Қастық ойлаған адам болса,

Құдайым састырсын,

Көңілін пәс қылсын.

Қас дұшпаның болса,

Қара таспен бастырсын.

Құдайым абыройыңды астырсын,

Берекеңді тастырсын.

                                Әумин

**********

Атың, атың, ату бол,

Ағайынмен тату бол.

Жаз кигенің құлпы болсын,

Қыс кигенің түлкі болсын,

Бағаналы таудай бол,

Шағалалы көлдей бол.

 

Бұрама темір,сом алтын

Суға салса батпасын.

Тәңір берген несібең

Тепкілесең кетпесін.

Желінің о шеті мен бұ шетіне

Артқан тартса жетпесін.

Сенен байлық кетпесін!

***********